ঘোঁৰা
গোলাপ কুমাৰ
চহৰখনলৈ যেতিয়া আন্ধাৰ নামে
ৰণুৱা ঘোঁৰাটোৰ
নাকী চিঙে
নাকীহীন ঘোঁৰাটোৱে
চহৰখনৰ চৌপাশ তচনচ কৰে
অলিয়ে-গলিয়ে কোৰ্হাল কৰে।
ঘোঁৰাটোৱে
চহৰখনৰ ঠিক মাজমজিয়াত
অঘোষিতভাৱে বিদ্ৰোহ কৰে।
বিজেতা ঘোঁৰা।
কেৱল বিদ্ৰোহ।
কেৱল বিজয়ী।
চহৰখনৰ ঘন অৰণ্যৰ
দীঘলীয়া বাটটোৱেদি
ৰণুৱা ঘোঁৰাটোৰ
অহা-যোৱা
অবিৰাম
এই যাত্ৰা
কেৱল ৰণৰ ঘোঁৰা, ৰণুৱা ঘোঁৰা।
সামুদ্ৰিক ঢৌৱে কোবাই যায় চহৰখন
সেয়ে চহৰখন ক্লান্ত
ঘোঁৰাটো অক্লান্ত
বিজয়ী ঘোঁৰাটোৰ বুকুৱে-বুকুৱে
চকুৱে-মুখে
জয়ৰ
আনন্দ!
ঠিকনাঃ মৰিগাঁও
ফোনঃ ৯৩৬৫৫১৩০৯২
